【娛樂新聞】衛詩雅百花獎封后 51票壓倒性擊敗對手.第38屆大眾電影百花獎頒獎典禮今晚（10日）在北京國家速滑館「冰絲帶」舉行。香港演員衛詩雅（Michelle）憑藉電影《破·地獄》中「郭文玥」一角，以51票嘅絕對優勢擊敗高葉（26票）、宋佳（18票）等對手，成功摘下最佳女主角殊榮，成為首位獲得百花獎影后嘅香港女演員。

衛詩雅上月底拍攝電影《狩謊》時發生意外，嘴部受傷縫合超過50針。今晚佢帶傷出席頒獎禮，身穿一襲紅色抹胸長裙踏上紅地氈。由於傷口剛拆線，佢透露呢幾日都唔可以化妝，尤其係傷口位置，需要戒口，說話唔可以太大動作，更唔可以大笑。佢慶幸老公係醫美醫生，可以幫佢跟進之後嘅療程。

當大會宣布衛詩雅獲獎時，佢一度露出難以置信嘅表情。上台領獎時，佢強忍激動情緒，感謝《破·地獄》所有主創同觀眾。佢感性表示：「一部好電影可以改變人生，可以令我們活得更好，以後我會拍更多打動人心的好角色。」佢亦將電影中嘅一句對白送給大家：「難得我們的人生上了這趟車，我們就好好的享受一下沿途的風景，好好的跟你身邊的人聊聊天，這趟車才算是值得。」

衛詩雅去年已憑《破·地獄》獲得香港電影金像獎最佳女主角，今次再下一城成為「雙料影后」，演技獲得兩地觀眾肯定。