陳凱琳承認收到《浪姐7》邀請 鄭嘉穎全力鼓勵趁年輕乜都試 談蔡思貝離巢TVB：望對方有更好發展.陳凱琳今日出席口腔護理品牌活動，受訪時首度正面回應坊間熱傳多時的獲邀加盟內地人氣綜藝《乘風破浪的姐姐》第七季（簡稱《浪姐7》）的消息，同時亦談及同屆港姐蔡思貝早前宣布離巢TVB的話題，大方分享育兒心得、回應網上傳聞，仲分享了多件生活趣事。

對於網傳已久的《浪姐7》參賽消息，陳凱琳首度開腔承認的確收到了節目邀請，目前正等候最終細節落實，自己亦已經同步做定相關準備。佢坦言，唱歌跳舞向來都唔係自己嘅強項，今次參賽對佢而言絕對係一個極大挑戰：「你幾時見過我唱歌跳舞？當年選港姐嘅才藝表演都只係少少，當時真係冇咩才藝先勉強拿出來應付。」

佢透露，而家間中都會練歌，相較之下唱英文歌會比較順手自在，反而擔心唱廣東歌時咬字唔夠準確，影響最終的表演表現，亦都會預先準備不同風格的歌，視乎節目安排再做調整。提到老公鄭嘉穎的意見，陳凱琳就大讚對方百分百支持，不過最擔心的反而是佢的心理質素：「佢話今季節目係全直播形式，表演完全冇得後期修飾，觀眾會直接睇到你最真實的一面。佢反而唔擔心我表演，最驚我面對外界的評論會受影響，成日提我要調整好心態，記住呢個係一個學習體驗，盡力就好。」至於大家最關心的拍攝周期同家庭安排，陳凱琳就透露，節目通常係連續拍攝兩星期，就會有5至6日假期可以返港，目前已經同家人溝通好相關安排。佢甜笑大讚鄭嘉穎係超級好爸爸，全程全力撐自己：「佢成日同我講，趁後生有機會就多啲去嘗試，屋企有佢睇住，完全唔使我擔心。」至於坊間流出的參賽名單，佢就話未睇過完整名單，唔想預先畀自己無謂壓力，要等正式確定參加先會去了解節目製作，就算最後去唔到都會保持平常心。

談及同屆港姐蔡思貝早前正式宣布離巢TVB，陳凱琳就表示，自己同蔡思貝一直都有偶爾聯絡，大讚對方係一位非常敬業樂業的演員同藝人，十分支持佢接下來的工作同發展方向。佢坦言，自己兩年前都經歷過同樣的階段，好明白離巢後大眾會對當事人的下一步動向充滿好奇，呼籲大家可以俾多啲空間蔡思貝去發掘自己的更多可能性：「無論佢之後想拍電影，定係有其他計劃，我哋盡量支持佢就夠了。」佢仲笑言，如果蔡思貝之後有興趣做KOL，自己完全可以分享相關心得：「我哋係同一屆港姐出身，出來之後大家走嘅路都好唔同，而家可以見到彼此都有屬於自己的發展，我覺得呢件事真係好美好。」

今次出席口腔護理活動，陳凱琳就分享，自己向來都非常著重牙齒護理：「我好怕食完嘢之後，牙齒上面會有一層薄薄的膜，驚之後拍照會唔夠靚，所以一直都好注重呢方面。」

除咗自己做好護理，佢同鄭嘉穎從小朋友細個開始，就培養佢哋正確的刷牙習慣。佢分享，小朋友有時會覺得牙刷唔舒服，或者隨便刷20秒就收手，所以佢哋會用播歌、玩小遊戲的方式，引導小朋友刷夠時間，刷完之後仲會全家熱烈鼓掌鼓勵：「小朋友收到讚美，就會更願意去配合呢件事。」佢再度大讚鄭嘉穎係百分百好爸爸，唔止會全力支持佢的工作，仲會主動檢查小朋友刷牙刷得乾唔乾淨，教導佢哋刷後面的牙齒。佢笑言，大仔最近係學校學識原來刷牙仲要刷舌頭，返屋企仲專登同佢分享，令佢都覺得好欣慰。

採訪中，陳凱琳亦都親自回應了近期網上的多個傳聞。針對早前同媽媽拍攝婦女節特輯，被指刻意開拓內地市場，佢就澄清，當時純粹係因為婦女節將至，想同媽媽拍一輯照片留低回憶，並非刻意開拓市場：「我冇話一定要去開拓邊個市場，純粹覺得有好的機會來到，我就會好好把握，無論係邊個市場，最重要都係勤力做好自己本分。」

而針對網上熱傳的「三萬呎豪宅」同「屋企周圍掛滿自己性感相」的說法，佢就哭笑不得地澄清：「早前拍片的屋企係借朋友的，我平時拍片會去studio、好多唔同的場地，已經連續四五個地方被人誤會係我屋企，仲話我間屋有三萬呎，真係講笑而已。」至於性感相的傳聞，佢就解釋，當年拍的唯美性感相，老公只俾掛係房間入面，絕對唔會掛係客廳，網上見到的都係房間入面的畫面，屋企其實更多掛的是一家人的合照，絕非大家所講的「自戀」。

另外，佢仲分享，最近有朋友同佢講，Threads上面當年《粉身碎骨》的經典片段再次翻紅，仲變成了潮語。佢笑言，早前去澳門工作見到丁子朗，對方專登同佢講呢件事，自己一開始仲驚又做咗咩事，知道之後反而覺得唔錯：「呢件事可以永遠拎出來做搞笑話題，都幾好。」

最後，佢仲分享了一件溫馨趣事，話自己而家仲保留住17歲外國畢業舞會（Prom）的裙子。佢憶述，當年同媽媽搵咗好多店都搵唔到心水的裙子，最後係一間二手店見到呢條大碼裙，買回來改裙的錢仲貴過條裙本身，當時自己都唔想買，但媽媽話人生一次，好似婚紗咁要留低回憶，所以先保留到而家，直到而家諗起都覺得好感動。TVB